खावडा ट्रान्समिशन प्रकल्पग्रस्तांना पारदर्शक भरपाई; शेतकऱ्यांचा सकारात्मक प्रतिसाद
खावडा ट्रान्समिशन प्रकल्पग्रस्तांना पारदर्शक भरपाई; शेतकऱ्यांचा सकारात्मक प्रतिसाद
पालघर : खावडा ट्रान्समिशन प्रकल्पामुळे प्रभावित झालेल्या पालघर जिल्ह्यातील शेतकऱ्यांना नुकतीच पीक भरपाई देण्यात आली असून ही भरपाई डिमांड ड्राफ्टच्या स्वरूपात वितरित करण्यात आली. संपूर्ण वितरण प्रक्रिया पारदर्शक, वेळेवर आणि नियोजनबद्ध पद्धतीने पार पडल्याची माहिती स्थानिक प्रशासनाने दिली.
गुजरात राज्यातून महाराष्ट्रासाठी उभारण्यात येणाऱ्या उच्च दाब वीजवाहिन्यांच्या केंद्र सरकारच्या महत्त्वाकांक्षी उपक्रमांतर्गत, पालघर जिल्ह्यातील अनेक गावांमध्ये ट्रान्समिशन टॉवर्स उभारले गेले. या कामामुळे अनेक शेतजमिनी प्रभावित झाल्या. परिणामी, संबंधित शेतकऱ्यांना योग्य पीक भरपाई देण्याची गरज ओळखून, ऊर्जामंत्रालयाच्या मार्गदर्शनाखाली आणि स्थानिक प्रशासन व कृषी विभागाच्या समन्वयाने ही प्रक्रिया हाती घेण्यात आली.
शेतीचा प्रकार, उत्पादनाचा हंगामी कालावधी, शेतीपद्धती आणि जमिनीचे शेतीमूल्य या घटकांचा विचार करून भरपाईचे दर ठरवण्यात आले होते. या आधीच जाहीर करण्यात आलेल्या दरांवर शेतकऱ्यांनी समाधान व्यक्त केले होते. शेतकऱ्यांनी मोठ्या संख्येने या वितरण प्रक्रियेत सहभाग घेत सकारात्मक प्रतिसाद दिला.
डिमांड ड्राफ्ट मिळाल्यानंतर अनेक शेतकऱ्यांनी प्रशासनाच्या कार्यपद्धतीबद्दल समाधान व्यक्त केले. काहींनी या प्रकारची पारदर्शक भरपाई प्रक्रिया इतर प्रकल्पांसाठीही आदर्श ठरावी, अशी अपेक्षा व्यक्त केली.
जिल्हास्तरीय अधिकारी, कृषी विभागाचे कर्मचारी आणि संबंधित यंत्रणांचे या यशस्वी वाटप प्रक्रियेत मोलाचे योगदान राहिले. अशी न्याय्य आणि वेळेवर भरपाई देणारी यंत्रणा शेतकऱ्यांचा विश्वास वाढवणारी ठरते आणि भविष्यातील पायाभूत प्रकल्पांमध्ये स्थानिकांचा सहभाग मिळवणे सोपे होते.
Comments
Post a Comment