गुंदले ग्रामस्थांचा करमतारा कंपनीला तीव्र विरोध – ग्रामपंचायतीचा एकमताने ठराव

गुंदले ग्रामस्थांचा करमतारा कंपनीला तीव्र विरोध – ग्रामपंचायतीचा एकमताने ठराव

पालघर : बोईसर पूर्वेकडील गुंदले ग्रामपंचायत हद्दीतील करमतारा इंजिनिअरिंग प्रायव्हेट लिमिटेड या लोखंड प्रक्रिया करणाऱ्या कंपनीला ग्रामस्थांनी तीव्र विरोध दर्शवला आहे. पर्यावरण आणि आरोग्यावर होणाऱ्या दुष्परिणामांच्या भीतीने गावकऱ्यांनी एकजूट होत ग्रामपंचायतीमध्ये ठराव संमत केला असून, कंपनीच्या स्थापनेस विरोध दर्शविला आहे.

गुंदले गावातील सर्व्हे नंबर २०७/२ आणि २०८/३/१ हद्दीतील लोकवस्तीलगत ही कंपनी स्थापन करण्यासाठी ग्रामपंचायतीकडे बांधकाम परवानगी आणि ना-हरकत प्रमाणपत्राची मागणी करण्यात आली आहे. मात्र, या कारखान्यामुळे होणाऱ्या प्रदूषणामुळे गावकऱ्यांनी कडाडून विरोध केला आहे.

प्रदूषण आणि आरोग्य धोक्यात – ग्रामस्थ आक्रमक

ग्रामस्थांच्या मते, लोखंड प्रक्रिया करण्यासाठी या कारखान्यात १२०० ते २१०० सेल्सिअस तापमानाच्या भट्ट्या आणि बॉयलर वापरण्यात येणार आहेत. तसेच, गॅल्वनायझिंग कोटिंग प्रक्रियेत झिंक आणि इतर धातूंचा वापर होणार असून, त्यातून होणारे वायू आणि सांडपाणी पर्यावरणाला घातक ठरणार आहे. हे सांडपाणी सूर्या नदीत मिसळल्यास संपूर्ण पालघर तालुक्याच्या पाण्याचा प्रश्न निर्माण होईल. गावातील विहिरी, बोरिंग आणि शेतीचे मोठे नुकसान होण्याची भीती ग्रामस्थांनी व्यक्त केली आहे.

ग्रामसभेत ठराव, आंदोलने आणि प्रशासनाला निवेदन

ग्रामस्थांनी कंपनीच्या विरोधात आक्रमक भूमिका घेतली असून, पंचायत समिती पालघरच्या गटविकास अधिकाऱ्यांना निवेदन देण्यात आले आहे. ता. १२ रोजी ग्रामपंचायतीत ठिय्या आंदोलन करण्यात आले, जिथे मोठ्या संख्येने महिलांची उपस्थिती होती. ग्रामसभेत ठराव संमत करत, कंपनी सुरू होऊ नये यासाठी ठाम भूमिका घेण्यात आली आहे.

ग्रामस्थ आणि स्थानिक नेत्यांच्या प्रतिक्रिया

रोहन पाटील, सामाजिक कार्यकर्ते: "करमतारा कंपनी गावात आल्यास जलप्रदूषण, वायुप्रदूषण आणि ध्वनिप्रदूषणामुळे ग्रामस्थांचे आरोग्य धोक्यात येईल. शेती हाच आमचा उपजीविकेचा आधार आहे, तो उद्ध्वस्त होईल."

नीलिमा पाटील, उपसरपंच, गुंदले: "ग्रामपंचायतीने कोणताही ना-हरकत दाखला दिलेला नाही, आणि भविष्यातही देणार नाही. आम्ही ग्रामस्थांसोबत आहोत."

तृप्ती योगेश पाटील, माजी सदस्या, पंचायत समिती, पालघर : "प्रदूषणकारी कंपन्यांना गावात येऊ देणार नाही. गटविकास अधिकाऱ्यांना ग्रामस्थांचा विरोध कळवला आहे. भविष्यातही अशा प्रकल्पांना विरोध करणार आहे."

ग्रामस्थांचा इशारा – कंपनी सुरू करण्याचा प्रयत्न झाल्यास तीव्र आंदोलन

ग्रामस्थांनी स्पष्ट इशारा दिला आहे की, प्रशासनाने गावकऱ्यांचा आवाज न ऐकल्यास तीव्र आंदोलन छेडले जाईल. कंपनी मंजूर करण्याच्या हालचाली राजकीय दबाव आणि दलालांच्या मदतीने होत असल्याचा आरोपही करण्यात आला आहे.

ग्रामस्थांची एकजूट – 'करमतारा रद्द'च्या घोषणा

गावकऱ्यांनी ‘करमतारा रद्द’च्या घोषणा देत, गावभर जनजागृती मोहीम सुरू केली आहे. याआधीही कंपनीसाठी रस्ता तयार करण्याचा प्रयत्न झाला होता, मात्र ग्रामस्थांनी तो हाणून पाडला. स्थानिक नागरिक आणि कार्यकर्ते आता आणखी मोठ्या आंदोलनाच्या तयारीत आहेत.

ग्रामस्थांचा निर्धार स्पष्ट आहे – गुंदले गाव प्रदूषणमुक्त राहिले पाहिजे, आणि कोणत्याही परिस्थितीत करमतारा कंपनीला गावात येऊ दिले जाणार नाही!