सूपमध्ये झुरळ आढळले; हॉटेलमधील अस्वच्छतेचा भोंगळ कारभार उघड

सूपमध्ये झुरळ आढळले; हॉटेलमधील अस्वच्छतेचा भोंगळ कारभार उघड

बोईसर  – बोईसर पूर्वेतील यशवंत सृष्टी परिसरातील एका नामांकित हॉटेलमध्ये सूपमध्ये झुरळ आढळल्याची घटना उघडकीस आली असून, या प्रकारामुळे ग्राहकांमध्ये तीव्र संताप व्यक्त करण्यात येत आहे. या घटनेची तक्रार अन्न व औषध प्रशासनाकडे  दाखल करण्यात आली आहे.

नागझरी परिसरातील एका ग्राहकाने संबंधित हॉटेलमध्ये सूप मागवले असता त्यामध्ये झुरळ असल्याचे निदर्शनास आले. हा प्रकार ग्राहकाने तत्काळ हॉटेल व्यवस्थापकाच्या निदर्शनास आणून दिला. तसेच, घटनेचा व्हिडीओ मोबाईलमध्ये चित्रीत करून सोशल मीडियावर प्रसारित करण्यात आला. त्यामुळे परिसरात खळबळ उडाली आहे.

या प्रकारामुळे स्थानिक नागरिकांमध्ये नाराजीचे वातावरण असून, अन्न स्वच्छतेबाबत हलगर्जीपणा होत असल्याची भावना व्यक्त केली जात आहे. अशा प्रकारच्या घटनांमुळे नागरिकांच्या आरोग्याला धोका निर्माण होत असून, संबंधित हॉटेलवर तात्काळ कारवाई करण्यात यावी, अशी मागणी करण्यात येत आहे.

दरम्यान, या प्रकरणी अन्न व औषध प्रशासनाचे अधिकारी गोपाल माहोर यांच्याकडे अधिकृत तक्रार दाखल करण्यात आली असून, प्राथमिक तपास सुरू असल्याची माहिती समोर आली आहे. लवकरच संबंधित हॉटेलवर कारवाई होण्याची शक्यता वर्तवली जात आहे.