निलम संखे यांची उपसरपंच पदी बिनविरोध निवड

 निलम संखे यांची उपसरपंच पदी बिनविरोध निवड 

बोईसर ग्रामपंचायत सरपंच पदी दिलीप धोडी तर उपसरपंच पदी निलम संखे

बोईसर : संपूर्ण महाराष्ट्रातील सर्वात मोठी व श्रीमंत ग्रामपंचायत म्हणून ओळख असलेल्या बोईसर ग्रामपंचायत निवडणुकीत जनतेतून थेट सरपंचपदी दिलीप धोडी तर उपसरपंचपदी निलम संखे यांची बिनविरोध निवड करण्यात आली आहे.

बोईसर ग्रामपंचायतीच्या निवडणुकीत विरोधक नसल्यामुळे सदस्यपदी निलम संखे यांची निवडणूक निर्णय अधिकारी दवणे यांनी बिनविरोध निवड केली होती तर उपसरपंच पदासाठी सर्व सदस्यानी पाठिंबा देत प्रथमच बोईसर ग्रामपंचायत उपसरपंच पदासाठी निलम संखे यांची बिनविरोध निवड करण्यात आली आहे.

सर्व पक्षीय पाठिंबा मिळाल्यामुळेच मी उपसरपंचपदी विराजमान आहे. बोईसरचा विकास हा सर्व राजकीय पक्षांना व पत्रकार बांधवांना सोबत करण्यात येईल तसेच प्रलंबित विकासकामांना गती देण्याचे काम करू असे देखील उपसरपंच निलम संखे यांनी सांगितले.

सर्वांना विश्वासात घेऊन बोईसरचा विकास साधू तर एक अनुभवी उपसरपंच सोबत असल्यामुळे विकास कामे करताना अडथळा निर्माण होणार नाही. असे थेट सरपंच दिलीप धोडी यांनी बोलताना सांगितले.

सदर कार्यक्रमात निवडणूक निर्णय अधिकारी दवणे यांच्या उपस्थितीत थेट सरपंच दिलीप धोडी, भारतीय जनता पक्षाचे पालघर उपाध्यक्ष अशोक वडे, सामाजिक कार्यकर्ते चंद्रकांत जाधव, सुरेश जाधव, प्रशांत संखे,  किशोर संखे, माजी सरपंच, उपसरपंच , ग्रामपंचायत कर्मचारी तसेच बोईसर ग्रामस्थ, पत्रकार बांधव यांच्या उपस्थितीत सरपंच पदग्रहण तसेच उपसरपंच पदाची निवड करण्यात आली.